Skiptingu jarðhita í háhita og lághita má skilgreina á tvo vegu: á grundvelli hita í borholum — þar sem 200°C mælist ofan 1000 m dýpis er talað um háhita — og út frá uppleystum efnum í vatninu, en samkvæmt þeirri skilgreiningu tilheyra súrir hverir (gufu- og leirhverir) háhitasvæðum.
Háhitasvæði finnast í virka gosbeltinu á Íslandi og í framhaldi af því á úthafshryggjunum suður og norður af landinu. Á landi eru svæðin 25 til 40 talsins eftir því hvernig talið er, þar af 5–6 undir jökli.
Háhitasvæði verða til vegna heitra kvikuinnskota djúpt í jörðu. Á þeim er grunnvatn jarðhitakerfanna — djúpvatnið — við suðumark.